早前一直忙於拍戲嘅林峯上王梓軒主持嘅《V My Guest》節目做嘉賓,罕有大談感情事,大談自己擇偶條件之余,從心理測試當中知道林峯希望同邊位做隔離鄰舍,更爆出「最想同居嘅對象」,王梓軒更即興提出想同林峯組成唱跳組合「鬥舞」,場面爆笑又熱鬧。

另一半最緊要價值觀相同:入得廚房出得廳堂

一直忙於工作嘅林峯對感情事向來保持神秘,但遇上好朋友王梓軒嘅「快問快答」就罕有老實作答,最緊要自己同另一半價值觀要一樣,都鍾意食嘢要持家有道,擇偶條件就係「入得廚房出得廳堂」,煮嘢食要叻過自己,當被問到會唔會同另一半一齊做嘢拍MV,林峯大方表示絕對唔會!因為見到對方就會會笑場,都係公私分明好啲。

林峯最想和謝霆鋒「同居」識煮飯嘅鄰居最好不過

每一位上《V My Guest》節目嘅嘉賓都會通過王梓軒特別設計嘅心理測驗,今次為林峯設計嘅係係一棟公寓裡面,要安排自己曾經合作嘅藝人朋友們入住係自己嘅附近,當中可以揀嘅男藝人包括:三哥苗僑偉、古天樂、謝霆鋒、MC JIN歐陽靖、鄭愷、吳卓羲;女藝人包括:楊千嬅、蔡卓妍、佘詩曼、徐子珊、周麗淇、迪麗熱巴等等。林峯爆料因為謝霆鋒好叻煮嘢食,所以安排住係自己樓下,方便可以去佢屋企食好嘢,至於識咗好多年嘅吳卓羲因為互相瞭解所以可以住係自己樓上,阿Sa蔡卓妍因為講嘢斯文細聲所以可以住係自己右邊,林峯非常搞笑咁安排周麗淇住入自己間房,佢話因為Niki係自己嘅姐姐,三哥苗僑偉、阿佘、鄭愷、迪麗熱巴都住係周圍附近,理由多數係識煮飯或者可以幫林峯搬家,勁爆笑!估唔到最後測試出林峯最想同霆鋒「同居」,林峯聽後都開始大笑,阿Sa嘅結果係林峯最好的朋友,佘詩曼則係林峯會分享煩惱嘅朋友,吳卓羲係林峯偷偷鍾意嘅人,講到呢度,林峯話:我唔係偷偷地鍾意吳卓羲,我係公開話自己鍾意佢呀!十分幽默,更大贊心理測驗真係有啲料到!

 

       林峯亦有係訪問裡面提到自己拍戲嘅種種辛酸,包括第一次要剃光頭飾演皇太極嘅《獨步天下》,仲有全身要沾滿毛嘅《大潑猴》,好在係演唱會之前訓練到體能唔錯先可以應付自如。傾到最後,王梓軒提出要同林峯組成唱跳組合,大玩即興加速演繹林峯跳舞歌曲,玩到唔捨得停,畫面搞笑又熱鬧,難得一見。