近日,王梓軒(Jonathan)再推新歌《邊緣引力》,新歌講述需要有勇氣跳出框框,王梓軒搵來老友王君馨(Grace)向自己發出挑戰,Grace思量平時極為注重飲食嘅Jonathan應該放縱一下,挑戰自己食一般平時唔會食嘅食物。於是二人發起12小時內食「10,000 Calories Challenge」。

 

 

      為保身材,做藝人必須放棄好多高卡食物,當中唔少得要放棄自己鍾意嘅嘢,Grace同Jonathan放縱進食12小時梗係要將自己平時好想但唔掂得嘅嘢食一次過滿足,開波食第一餐,Jonathan食炒蛋加奶昔,有3000卡路里,而Grace食公仔麵,只係食咗2000卡路里,為咗目標10k,Grace係挑戰前做咗好多Research,發現其實頂級運動員每日都需要在一日內攝取10k卡路里,相對地亦要做非常多嘅運動配合,所以Grace同梓軒係放縱進食之後隨即出門踩單車消耗熱量,運動後繼續喪食下一餐,將平時因為高卡而放棄嘅美食通通擺入口,眼見啱開始仲係幾滿足嘅表情,不停加碼食到第三餐後,狀態開始唔同晒,焦慮自己腰圍變粗,更即刻上磅測試一日喪食會增加幾多磅,之後出動拍打肚皮消耗熱量,十分搞笑。

 

      佢地亦有提到本次挑戰絕唔會浪費食物,就算12小時食唔晒都可以留待之後或請朋友食,而且Grace同Jonathan平時都有做開好多Training,普通人唔好亂試。挑戰去到臨近極限時,Grace鼓勵自己食埋最後一條雪條,而Jonathan則飽到訓係地碌來碌去,冷靜後佢地發現挑戰背後嘅意義,原來一次過坐擁鍾意嘅美食,感覺並唔好,好多人可能想食都未必食到,想要咩就即刻擁有,好容易會忘記一步步得到嘅樂趣,反而會令到人唔懂得知足,無論係食嘢或者係做嘢,都係努力爭取後得到嘅先係最好。玩Challenge玩得咁認真,值得大家俾Like!