最近,容祖兒為宣傳全新國語大碟《答案之書》中港台三地走,日前佢就飛到上海同成都舉行校園巡迴音樂會。
校園巡迴音樂會第一站喺上海交通大學舉行,當晚祖兒同同學們大談新碟《答案之書》製作嘅心路歷程,仲分享自己嘅生活點滴,祖兒話對自己要求嚴格,特別係呢幾年一直苦練普通話,「既然是國語專輯,就要把國語練好,做宣傳、採訪時,也能把專輯解釋得更清晰,才是對專輯和歌迷最大的尊重。」亦因為呢份尊重,祖兒舊年只係休息咗九日,因為佢覺得:「時間有限,所以只能付出更多才能做得更好。」音樂會上,祖兒一連唱出《亞亞亞》、《長大》、《容光》、《剛好》、《孤單喧嘩》五首新歌及經典情歌《謝謝你愛我》,音樂會接近尾聲時,祖兒仲驚喜地清唱出佢嘅永恒情歌《黃色大門》,每個瞬間都
充滿感動。
巡迴第二站去到成都四川傳媒學院,同第一站一樣,祖兒除咗現場演繹咗六首新歌,仲同同學仔唱談人生,當講到《長大》呢首歌時,祖兒就話:「我們總以為自己已經長大,然而回頭看,其實很多事情可以處理的更成熟,但人生沒有完美。」對於祖兒嚟講,長大係一件永遠嘅事,學識接受唔完美嘅自己,點樣活得舒服、自在係佢嘅處世哲學。音樂會完結前,祖兒又有驚喜俾大家,除咗再一次清唱《黃色大門》,仲唱埋《心之科學》同《破相》三首廣東歌,將氣氛推至高峰。除此之外,祖兒仲透露2019年將會舉行佢入行二十周年世界巡迴演唱會。